??Twee uit drie adolessente wat met pulmonale tuberkulose (TB) gediagnoseer is, ervaar longabnormaliteite selfs nadat hulle die behandeling vir hierdie siekte suksesvol voltooi het.
Hierdie onrusbarende bevinding is onthul in 'n nuwe studie deur navorsers van die Universiteit Stellenbosch (US), wat onlangs in die prominente mediese joernaal, The Lancet se reeks, eClinicalMedicine gepubliseer is. Dit is die eerste studie wat longfunksie in adolessente met TB omvattend geassesseer het tydens én na voltooiing van anti-TB-behandeling.
“Daar is min kennis oor post-TB-longsiekte by adolessente," verduidelik die studieleier, dr Marieke van der Zalm, by die US se Desmond Tutu TB-sentrum. “Ons data dui daarop dat 'n groot deel van adolessente verswakte longfunksie het na suksesvolle voltooiing van TB-behandeling. Strategie? is nodig om individue met 'n risiko vir asemhalingsmorbiditeit te identifiseer, asook intervensies om longgesondheid na TB te verbeter."
Elke jaar ontwikkel 'n geraamde 850 000 adolessente tuberkulosesiekte, waarvan ongeveer 90% in lae- en middelinkomstelande woon. Adolessensie is 'n belangrike tydperk vir longgroei en respiratoriese siektes, soos TB, kan moontlik inmeng met normale longontwikkeling. Tuberkulose tydens adolessensie kan dus 'n persoon se vermo? om volle longpotensiaal te bereik negatief be?nvloed.
“Met die kombinasie van die ho? TB-las, die ernstige aard van TB-siekte, sekere gedragsaspekte (insluitend rook), en die kritieke tydperk in longontwikkeling, kan adolessente meer TB-geassosieerde respiratoriese morbiditeit hê in vergelyking met volwassenes," waarsku Van der Zalm. "Met 'n langer lewensverwagting ná TB in vergelyking met volwassenes, kan adolessente aansienlik bydra tot die algehele ongeskiktheidslas wat deur TB veroorsaak word."
Die studie het 100 adolessente in Kaapstad, Suid-Afrika, tussen die ouderdomme van 10 en 19 jaar ondersoek. Die studie het die longfunksie van 50 adolessente wat met TB gediagnoseer is, vergelyk met dié van 50 gesonde adolessente wat aan TB blootgestel is, maar nie siekte ontwikkel het nie. Die groep wat met TB gediagnoseer is, het 'n reeks longfunksietoetse (spirometrie, plethysmografie, diffusiekapasiteit-longfunksie en ses-minuut-staptoets) uitgevoer twee maande nadat anti-TB-behandeling begin is, en weer na die voltooiing van behandeling, gemiddeld 'n jaar later. Resultate van die eerste assessering (wat twee maande na behandeling uitgevoer is) het abnormale longfunksie onder 76% van adolessente gevind, en 65% het steeds abnormale longfunksie getoon tydens die tweede assessering wat uitgevoer is na suksesvolle voltooiing van behandeling.
“Die feit dat adolessente met TB na suksesvolle behandeling algehele laer longfunksie het in vergelyking met hul eweknie? is kommerwekkend, want dit kan beteken dat hulle nie hul volle potensiaal sal kan bereik as volwassenes nie, en loop ? ho?r risiko om vroegtydig chroniese longsiekte te ontwikkel. Studies het getoon dat selfs matige inkorting van longfunksie geassosieer word met verhoogde risiko van hart- en longprobleme later in die lewe, of selfs voortydige dood. Gevolglik toon ons data dat adolessente wat TB gehad het die risiko loop om permanente langtermyn hart- en longprobleme te ontwikkel," waarsku Van der Zalm en kollegas.
“Ons resultate toon dat adolessente dringend ingesluit moet word by studies wat die voorkoming en behandeling van tuberkulose-geassosieerde respiratoriese morbiditeit ondersoek; dit sluit die behoefte in om longgesondheid as 'n uitkoms binne tuberkulosebehandelingsproewe by adolessente te assesseer," sluit hulle af.
Foto-onderskrif: Dr Marieke van der Zalm
